*ياولاد وريدى*

Spread the love

ياولاد وريدى

****************

كُــنتُـم عِـــــــزوتِــــــــــى

 يا ولاد وريدى و شريانى

 أيّــامى ليه مِـتيَـتّمــة ؟

 قلبى بينزف وعيونى

 تايهة فى خيالات العمى

 رَحِــمى الكبير جابكم على ضهر الحياة

 وماكُـنتِـــش أعرف إنكم

 حـتـنـقشوا لون السواد على توبى الأبيض

 على طَـرحتى و تـبَـقّــعوا لون فَرحِتى

 يا خِـــلفِــــتى

 كان صوتكوا واحد كان مسموع

 ضاع صوتكوا ليه ومالوش صدى ؟

 و الــكَـــف كان بيلمكم

 يتفرق ليه لخمسين كف ؟

 والحلم كان واحد لكم

 دلوقتى أصبح مية وألف

 بيتنا الكبير اللى لاممنا

 بتهدوا حطانه وعمدانه

 البيت مش حيط ومغطيه سقف

 البيت ناس تتغطى بناس

 دفا أنفاس

 دفا الضحكة دفا الكلمة

 من قلب لقلب وبيتنا كان بالنى لاخضر

 والبنا كان فنان

 يرص الطوبة بالموال

 وينقشها عرق أجيال

 ولو بنيتوه بحجر صوان

 من غير أساس حتلقوه مال

 كنت أنا بتحامى ف عزوتكم

 كان صوتكو ف جنبى يحوش الخوف

 الورد على جبينى بقى ضعيف

 ما عادشى شوكى قادر يحميه

 فين الطريق خد خطاويكم ؟

 مين غيرى كان بيربيكم ؟

 ما تطبطبوش على كتافى

 طبطبوا ع الجرح ولموه

 سقيناكم لما نشف ريقى

 قلبى الأخضر نشفتوه

 ما بقاش فى صدرى أديكوا تانى

 نشف كبدى

 دقوا البيبان المسكوكة

 لموا الجراح قبل ما يتوه الصباح

 قبل ما يضيع البراح

 لموا كفوفكم كف بكف

 إكوى يا ولدى الجرح ف كبدى بجمرة نار

 يمكن جرحى يبطل نزف

 وأرقد بسلام آخر رقدة

 رقدة موت أو رقدة ترد ف قلبى الروح

 رقدة موت أو رقدة ترد ف عمرى الروح

*********************

بقلم

أبو عمار المصرى

تحرير

أميرة الألفى

تعليقات الفيس بوك

التعليقات

عن سكرتيرة التحرير الكاتبة أميرة الألفي

x

‎قد يُعجبك أيضاً

*”المدفعجية” تحيى حفلات الربيع بالغردقة والجلاء والقرية الفرعونية*

Spread the loveتحيى فرقة المهرجانات “المدفعجية” عدة حفلات خلال أعياد الربيع، حيث ...