الرئيسية / أدب الكتاب / مهما قالو وكتبو عنك ……….. بقلم ………. ( احمد هلال )

مهما قالو وكتبو عنك ……….. بقلم ………. ( احمد هلال )

Spread the love

مهما قالو وكتبو عنك

الكلام مــ هيوفي حقك
أنتي أمي وأنتي عمري
كل كلي تحت رجلك
أنتي سكه لحسن ديني
أنتي طوق مايوفي ديني
نوربيضوي جوا عيني
وف غيابي ياما عنك
كنتي صابره كتير عليا
صرت من بعدك ضحيه
لسه ياما كل حاجه بفتكرها
بفتكر كل الساعات
ضحكتك انا لما كنت
بضرب اخواتى البنات
كنتى بتقولى دا راجل
ربي زيده ف الثبات
أيوة بدعيلك يا أمي
تسكنى الجنه ونعيمها
تشهدى بالله فى قبرك
وف ثبات
فاكرة ياما
لما كنت عليكى بجرى
تفتحي حضنك أوام
وتقوليلي نام ف حجري
حتى لما كبرت حبه
كل حبك زاد ب حبه
والمحبه لسه ياما
عايشه جوة الروح تبات
وسط أحضانك خدينى
آه نادينى
يابن بطنى وحته مني
قلبي شافك قبل عينى
قولي ياما إزى حالك
قلبي عندك بيناديكي
حسه بيا
أني عندك جاي أبات
جاي وجايب لك بخور
حتى قبرك زاد ف نور
أنتي ساكنه الجنه ياما
طب وليه زايده حلاوه
قلبي شافك مش بعيني
مبني سور بينك وبيني
بس شايفك بين ملايكه
جنه فيها انهار وحور
وأنتي وسطيهم جميله
زي وردايه ف خميله
تشربو م الكاس تدور
ذكرياتك حلوه ياما
فكرتني ايام زمان
رجعتي والضهر يدن
فى أدي لوح ويا الكتاب
يتبسم وشك ويدن
تفتحيلي الف باب
انت ياض ياحمد حبيبي
شوف هدومك والتراب
والله حلوه الذكريات
لسه ريحتك جوة بيتنا
ع الجدار أهي قاعده صورتك
والعلامه وضحه ياما فوق
ف قورتك
لسه وسط الطرقه
واقف فى أنتظارك
لسه طيفك وسط دارك
لسه سجادتك بتبكى وسبحتك
لسه جلاليبك بتحكي محبتك
لسه ياما وداني سامعه خطوتك
وإنتى جوة الليل تدبى
وإنتى ف التسبيح تحبي
تفرح الميه ف إيديكي
والوضوء بالنور يزيدك
وتنادينى قوم بسرعه
الفجر قرب صلي يابني
جوة نومى أروح مخبى
عيونى وإنتى بتيجى جمبى
وضحكتى تسبقنى منى
وأترمى ف حضنك يا أمى
والله وحشاني ياعمري
تعرفى إن الشوق كوانى
نفسي ارجع طفل تاني
نفسي بس أبوس إيديكي
نفسي أبيع العمر كله
لجل نظرة من عنيكي
لجل لمسه من إيدكي
فوق جبينى
لجل ياما نظره تشبع فيها عيني
نفسي ياما ف كل حاجه
بس عارف روحتى منى
لو تجينى جوة حلمي
بس أشوفك وتنادينى

بقلمي ( احمد هلال )

تعليقات الفيس بوك

التعليقات

عن نضال ابوغربية

x

‎قد يُعجبك أيضاً

( إشتقتُ عينيكِ ) ***** قصيدة ****** للأديب والإعلامي ******** ( يحيى عبد الفتاح )

Spread the loveقصيدة ( إشتقتُ عينيكِ )   إشتقتُ عينيكِ مازلت أبحث ...