*لسه*

Spread the love

لِــسـَّــــــــــة

***************

لِــسـَّــــــــــة

 فى الضَلمة .. حِـتَّــة مِن سَمانا

 حــنـيِّــــــنَـة

 تِـندَه عَلى الناس فى القُبور

 واللى عُـــمــرُه كُــلُــه

 قــضَّـــاه فى الطابـــور

 يِــحلَــم بِـــنــو ر

 لَــو حَــتى نــور الـمَــحــرقـَــة

 يا كل ضوء مَــــخنوق

 فى قلب قلبنا .. أصرخ بقى

 أُخرُج ألَم .. أُخرُج وَجَـع

 أخـــــرُج شَـقــــا

 لِسة الإرادة …… مُـمكنة

 لسة هناك …. مليون شهيد

 مستنيين ….. يوم الخلاص

 راسمين على صدورهم … أمل

 لسة الخريطة ..

 فيها ميت مليون مكان

 متشوقين .. طعم الرصاص

 لسة الحكاية ما إنتهتش

 لسة الستارة السودا …. مفتوحة

 لسة الحجارة ع الرصيف

 وجراحها مجروحة

 لسة السكك متمكنة

 من كل خطوات الأمل

 لسة الحروف .. متعشقة

 تعمل جمل

 لسة الربابة ..

 صوتها عالى بالموال

 لسة النشيد فى الناى

 مهما إتخنق … يتقال

 لسة الربيع .. بيمسى ع النوار

 والأرض لساها يا ناس

 كارهة البوار

 لسة الجدور عاشقة المناجل

 والسواقى والترع

 لسة البلد

 حبلة .. بكام مليون ولد

 يا تاريخ يا جاى بعد السنين

 ستف فى أوراقك

 لسة السطور … عاشقة القلم

 لسة الجراح …

 ساكن فى قلب موالها … الألم

 لسة … ولسة … حاجات كتير

 لسة العيون عميانة لجل ما

 يعموا الضمير

 لسة هنا …. عايش أنا

 من يوم ميلادى للممات

 عاشق لكل الأزمنة

 عاشق لكل الأمكنة

*********************

بقلم

أبو عمار المصرى

تحرير

أميرة الألفى

تعليقات الفيس بوك

التعليقات

عن سكرتيرة التحرير الكاتبة أميرة الألفي

x

‎قد يُعجبك أيضاً

*”المدفعجية” تحيى حفلات الربيع بالغردقة والجلاء والقرية الفرعونية*

Spread the loveتحيى فرقة المهرجانات “المدفعجية” عدة حفلات خلال أعياد الربيع، حيث ...