سَبْعِ الْبُرُمْبَا ..شعر شعبي بقلم الشاعر جمال الخطيب

مشاهدة
أخر تحديث : الأحد 9 أغسطس 2020 - 8:34 مساءً
سَبْعِ الْبُرُمْبَا ..شعر شعبي بقلم الشاعر جمال الخطيب

(سَبْعِ الْبُرُمْبَا ). دراما كوميدية ساخرة تناقش قضايا معاملة بعض الزوجات لحمواتهن وغياب شخصية الزوج الشّرقي الأصيل.
شعر شعبي على البحر السّريع
………………………………………………
ثُلاثيّةْ سَبْعِ الْبُرُمْبَا
**************
الصّفحه الأولى
قالَتْ سُعادْ لْ زوجْها الْمِغْوَارْ
إمّا أنا أوْ إمَّكْ بْ هَالدّارْ
شُفْلَكْ طَريقَه هيكْ عَالسُّكّيتْ
وِابْعِدْها لَتْفَكِرْ وَلا تِحْتارْ
تا نِسْكُنِ الثِّنْتينْ في هَالْبيتْ
بَعْمَلْ جَريمِي مَعْ سَبِقْ إصْرارْ
بِتْكونْ بيدَكْ يا حِلِوْ حَطّيتْ
كومِ الْخَشَبْ وِالْكازْ جَنْبِ النّارْ
مَهْما ازْعِلِتْ شَطّيتْ أوْ نَطّيتْ
لَتْلومْني شو ما حَصَلْ أوْ صارْ
إلذَّنْبْ مِشْ ذَنْبي إذا جَنّيتْ
أكْرَمْ إلَكْ نَفِّذْ بَلا أعْذارْ
مَعْذورْ لَوْ صِحْتُ و قُلِتْ حَبّيتْ
قَلبي مَبِدّو في هَواكِ شْريكْ
وِانْتِ بْحُضُنْ إمّكْ عَليكِ بْغارْ
ـــــــــــــــــــــــــــــــــــــــــــــــ
الصّفحَه الثّانيه
راحِ الْغَبي خَجْلانْ عِنْدِ امّو
نَصِّ الْحَكي هَرْبانْ مِنْ ثِمّو
لَكِنْ قَبِلْ ما يِطْرَحِ الْمَوْضوعْ
رَكْضَتْ عَليهْ لِمْسَخَّمي تْ ضُمّو
باسَتْ جَبينُو . مَسَّحَتْلو دْموعْ
حَسَّتْ بِحَجْمِ مْصيبْتو وّغَمّو
وِتْشَنَّجِ النَّشْمي مِثِلْ مَلْسوعْ
شَرِّ الْعَرَقْ وِانْسابْ مِنْ كُمّو
بَوَّسْ إيديها وِارْتَمى مَوْجوعْ
حَسِّ بْدَفى وِارْتاحْ مِنْ هَمّو
كيفِ انْعَمى . دَلْدَلْ ذِنيهْ بِخْنوعْ
ضِحْكَتْ عَليهْ بِنْتِ لْ مَيِتْسَمّو
كُلْ ما غِفي . قامُ و صِحي مَفْزوعْ
مِتْمَنّي لَوْ تِحْتو الأرِضْ تِنْشَقْ
بَلْكي الْقَبِرْ سَكَّرْ عَليهْ لَمّو
ـــــــــــــــــــــــــــــــــــــــــــــــــــــ
الصّفحه الثالثه
سَبْعِ الْبُرُمْبا قامْ عا حيلُو
جَرِّ السَّبِعْ عَالْبيتْ مِنْ ذيلُو
دَقْدَقْ عَبابِ الدّارْ فَتْحَتْلو
وِجْهو بِقَمِّرْ عيشْ يَحْليلو
نَسُّ وهَرَبْ عَالنّومْ عِرْفَتْلو
مِنْ يومْ يومُو ما عِلي خيلو
وِتْلَفَّحَتْ بِحْرامْ حَلْقَتْلو
وِتْقَلَّبِ الْحَيْرانْ في ليلو
هَمْسَتْ بِذانو نامْ .. قالَتْلو
بُكْرَا الصُّبِحْ بِتْشوفْ وَجْهِ جْديدْ
وِالّلي عَصاني بِيومْ يا ويلو
ـــــــــــــــــــــــــــــــــــــــــــــــــــــــ
…………………… الشّاعر : جمال الخطيب

تعليقات الفيس بوك

التعليقات

رابط مختصر