الرئيسية / الشعر العامى . / *رحتي فين؟ * بقلم محمد امام

*رحتي فين؟ * بقلم محمد امام

Spread the love

رحتى فين؟؟
رحتي فين يا ضحكتي
باللهِ قولي رحتي فين
تهتي ف خطاوي سكِّتي…
ولَّا عصف بيكي الأنين
باللهِ قولي رحتي فين
بدوَّر عليكي جوَّايا
مابين بكره وأسى أمسى
ويدوَّر ألمي ويَّايا
ويقول يا مركبي إرسي
وازَّاي ترسَي بدون شطِّين
باللهِ قولي رحتي فين
بضْحك يمكن افتكرواضحك
و دندن غنوتي تاني
ألاقى بكايا اللى بيضحك
من ضحْكتي وهذياني
ويقول ما شفتش فى الاسى
أكتر من ضحكتك ياحزين
بالله قول رحتي فين
آه من وجع الحروف
لمَّا تتوه بين المشاعر
وتوه معاها فكرتك معاد تشوف
ما يِلْقهاش ولا ألف شاعر
أهات فى أهات متخبِّلين
باللهِ قولي رحتي فين

آه يا ليل الغريب ياما انت قاسي
آه يا قلب الحبيب نكَّار وناسي
آه يا حلم اتقطف من غير أوانه
آه يا لوعة أصيل خانه زمانه
عصراني بين حسره وحنين
باللهِ قولي رحتي فين
بدوَّر علَّى ومش لاقى
واسأل نفسي عن نفسي
مشتاق للحظة تلاقي
اطَّمِّن فيها على نفسي
انا تهت منِّى ورحت فين
بالله قولي رحتي فين
عاشرت ناس من بعد ناس
وفرشت قلبي وانا راضي
واللي فرش قلبه بينداس
أصل الاحساس كلام فاضي
ولا حد يسأل دا قلب مين
باللهِ قولي رحتي فين

بقَلِّب بقلبي قلوب الناس
ألاقي فى النفوس توهة
واسأل ايه جرى للناس
ألاقي الكلمه مستوهة
وأهل المروءه تعبانين
باللهِ قولي رحتي فين
سبحان الحى اللي مايغفل
لفين يا غفله وخْدانا
وكل الناس كدا بتسأل
أُمَّال مين اللي ودَّانا
وأدينا ف دنيا الويل عايشين
و خلاص عرفت رحتي فين
انت في الهم والشكوى
وحكاوي ليل المحزونين
انت في التُّوهه والنَّجوى
وحنايا روح الغلبانين
خلاص عرفت انت فين
انت في دروب الطاعة بتمرحي
وف معيِّة رب القلوب بتطوفي
بتقولي زهد الناس دا بيتي ومطرحي
والصبرع الأزى مدادي وحروفي
ولو عايزني تلقاني في اليقين
خلاص عرفت انت فين
وحنْزعك من عِنْد قلب جبال الهم
وفتَّح ورود الأمل فى ضْلوعي
واطوي بالارادة بواقي الوهم
و بحكمتي ابدر بهاكي في ربوعي
و لا عدت أسأل رحتي فين
يا ضحكتي رحتي فين.

بقلم

محمد امام

تحرير

سعاد عدوش

 

تعليقات الفيس بوك

التعليقات

عن مشرف عام الأبواب وردة الأطلس

x

‎قد يُعجبك أيضاً

*البحر * بقلم محمد النور

Spread the loveالبحر بحر بلدي شاسع من عظمة ربي يحيط بالمغرب من ...