الرئيسية / أدب الكتاب / الى روحي بقلم الشاعر عبد الهادي شعراوي

الى روحي بقلم الشاعر عبد الهادي شعراوي

Spread the love

القصيدة التى كتبتها وابى على فراش الموت واليوم الذكرى الثانبة رغم رحيله هو معى دائما ويكفينى ملامحة التى ورثتها رحمك الله يا ابى ورحم امواتنا جميعا
……
الى روحى

رثيتك قبل الموت
وبعد الموت
أنا والقلب هنموت
لإنك قلمى وكتابى
عمود الخيمة والنبوت
ياغنوة عمر شعراوى
يانبض وصوت

دامهما كتبت مش هقدر
أوفى الدين
لإنك ضحكتى وعمرى
وضى العين
ومن غيرك تتوه
الخطوة والكلمة
تضيع فرحة الأيام
مع اللمة
ويسكن جوانا الأحزان
ماهو إنت الحضن والعنوان

سنين وسنين وأنا واخدك
صاحب وإمام
لاعمرك يوم نسيت ربك
ولا الإسلام
وفرض الله أديته
خلف إمام
ونص العمر عشته
ماخفت أكفان
فى صف الجيش
كنت درع للأوطان

دافعت عن العروبة سنين
بجزائر ويمن وفلسطين
حاربت فى سته وخمسين
وتشهد سبعة وستين
وفرحة أمة فى رمضان
وتشهد حرب لاستنزاف
بانك قلب عمره ماخاف
برغم الآهه والأحزان
رفعت الراية ع الأكتاف
وتكبيرتك سمعها الكل
ع الضفة حكاوى تطل
بتحكيلنا عن الأمجاد
فى أكتوبر محيتوا الذل
وعادت الفرحة للأوطان
وعادت سينا للأحضان

قضيت فى الجيش
فوق التلاتين
خرجت فى سته وتمانين
وكنت الأب والصاحب
بشرفك كلنا عايشين
لاعمرك يوم غلطت فى حد
ولاحتى رفعت الصوت
ووقت الجد
كنت الحكمة و النبوت
وكلمة حق لو هتموت

صبرت كتير على ألمك
ساقتنى والله من حلمك
دامهما كتبت أنا فيك
مايكفى الكلام عنك
لإنك قلبى والروح
ومهما قلت من بوح
مش هقدر أوفى الدين
ياروح القلب يا موحد
برب الدين

دا ألمك والله من ألمى
وهمك والله من همى
وياما مسحت أحزانى
ويشهد عمرى مع سنى
لإنك قلمى وكتابى
وغنوة عمرى وشبابى
طفولتى خدتنى فى حضنك
وصرت الحضن لأولادى

حكاياتك كتير وكتير
مايكفيها وسام تقدير
وتشهدها رمال سينا
ودم صرخته تكبير

لاعمرك يوم عديت حد
ولا هنت وهانك حد
ولما رقدت بفراشك
ماطلبتش حاجة من حد
صبرت ع البلاء والآه
رفعت الإيد وقلت الله
شكرت واللسان حامد
وقلت يارب أنا حامد
لفضلك والله أنا شاكر
ومهما بليتنى أنا صابر

ولإنى فرع من أصلك
حمدت الرب مع حمدك
وهفضل عمرى مديون لك
ليل ونهار هكون جنبك
هناجى الرب فى السموات
يحول الألام نسمات
ولو كنت البديل راضى
ياغنوة عمرى والسنوات

18447326_1378870905531835_1037323001011931195_n18447316_1378887378863521_7818100297204897334_n

تعليقات الفيس بوك

التعليقات

عن samira mahasen

x

‎قد يُعجبك أيضاً

ذكاء اختارها لكم الأستاذ أنوار أومليلي

Spread the love قيل : دخلت امرأة على هارون الرشيد . وعنده ...