إنشالله خــــــــير بقام الأستاذ محيى سنبل

مشاهدة
أخر تحديث : الأحد 22 يناير 2017 - 11:50 صباحًا
إنشالله خــــــــير بقام الأستاذ محيى سنبل

إنشالله خــــــــير
……………………
يافجر صحصح . .
قوم وصـبّح . .
ع المداين والكفور . .
العيون تاهت وكلت . .
والقلوب فى العتمة ضلّت . .
القلوب قبل العيون محتاجة نور . .
ترسم الأحلام حقيقة . .
بين نفوس طاهرة وبريئة . .
للخلاص متشــوّقة . .
بايته تحلم باللقا . .
تبدر الأرواح تقاوى . .
راح تداوى . .
يابلدنا . .
ذل مدنة . .
قام عليها الحق مات . .
أو كنيسة وفيها عيسى . .
دمعه نازل من سكات . .
والخلايق جوة بطن الخوف . .
بتعجن بالآهات . .
ليل أملهم . . ليل ألمهم . .
ليل وعمر الليل مافات . .
مكتوب علينا حتى فى الحلم الشقا . .
……………………………………
خير يابنى . . خير . . ؟
إنشالله خــــير . . ؟؟
ومنين حييجى يامـّه خير . . ؟
فى النوم ورانا بَرْضُه . .
كرباج الأباعد والأمير . .
مكتوب علينا حتى فى الحلم الشقا . .
شـايفنى يامه ف مشنقة . .
وحبـــــال كتيرة معلقة . .
زى الأفاعى ياامه . .
كانت دى الحبال . .
قدام عِنَيَّـا وبين إِيدَيـّـا . .
عن يمينى وف الشمال . .
وف كل حبل عيون كبيرة مبحلقة . .
للمربوطين ومعلقين فى المشنقة . .
مش عارفة اعيش . .
ولا حتى اموت . .
والدنيا ضلمة . . وآه ياخوفى . .
لما ضلمة يكفّنوها بالسكوت . .
وف لحظة شق الصمت صـوت . .
زى الطبول . .
اتفتحت كل القبــــور . .
واتلم كل الناس . .
فى كام مليون طابور . .
والراية خضرة . .
بس فاكر . . غيروها . . بدلوها . .
مرة حمرة . . مرة صفرة . .
بس آخر مرة فاكر . .
لِيّـــا أخ ف صف قام . .
شار علية وجه عليه وقال كلام . .
وف إيده راية سودة زى الليل تمام . .
ماقدرتش افهم منه كلمة . .
بس آخرة دا الكلام . .
بصيت لقيت الحبل داب . .
من فوق رقبتى الحبل ساب . .
سبت دوغرى المشنقة . .
وكلاب ورايا برضه تجرى . .
عيونها واسعة مبحلقة . .
بصيت لاخويا . . قلت اشوفه . .
شفت راسه معلّــقة . .
وعْيونه وسط الخوف نادتنى . .
بنظرة صافية صادقة . .
شفته شايل فوق كتافه هم بيت . .
وجريت وشلت الراية زيّه . .
لحد يامه ماانتهيت . .
…………………………………..
ياكبدى يابنى . . !!
كل ده شفته ف منامك ؟ . .
ربنا يحرس شبابك . .
ينصرك ع اللى يعاديك . .
م الأفاعى والديابة والكلاب . .
واللى عشش فى السياسة . .
بالغلاسة والخراب . .
واللا اقولك . .
مالنا يابنى بالسياسة . .
والأكابر والآنون . .
اللى رايده ربنا لازم يكون . .
واللى يظلم !! . .
راح يقابله فى الحساب . .
كل حاجة فى الكتاب . .
يابخت مين ياخده بيمينه . .
واللى خان ربه ودينه . . !!
آه ياويله م العذاب . .
………………………
طب ياأمى فين كتابنا . .
دا اللى ساكت ع الفساد . .
زى الشيطان . .
ده شيطان أخرس . .
منافق أو جبان . .
مش دا كلام المصطفى ؟ . . .
ياللى رضـّـعتى الأمانة والوفا . .
ياللى صبرك ع المعايش . .
يكسى برد الليل دفا ؟ . .
ربنا يغير حياتنا وذلنا . .
لو نغيـّـر نفسنا . .
قبل مايفوت الأوان . .
والخلايق ييجى يوم تعرف أمان . .
بانتصار الحق والنور والأمان . .
والمثل قال من زمان . .
إيش يافرعون فرعنك ؟ . .
مالقيتشى حد يلمنى . .
نفسى يامـّأ يوم حسابى . .
أفتخر باللى ف كتابى . .
والحبيب يفرح بصدقى . . يضمنى . .
……………………………….
والله يابنى قدرت تغلب لهفتى . .
وتهــزِّنى . .
ماتخافيش ياامه عليا . .
إطـّـمنى . .
قوم ياواد . . نسـّـيتنى اقولك . .
ع اللى كان واللى جرى . .
فيه جماعة مكشـّـرين ومبوّزين . .
فى المندرة . .
مستعجلين . . مش عارفة ليه . . ؟ . .
إنت بس مخبـّـى إيه ؟ ؟
وفهمت حاجة من كلام امى . .
اللى هية من طيبتها . . ماتفهموش . .
قلتلها يامه . . دول وحوش . .
همة دول ياما الأفاعى والحبال . .
هيئة رجال . . بقناع فشوش . .
عايزنّى اخاف . .
وادفن الأحلام فى صدرى . .
تحت جلدى وانحنى . .
والحيتان تصبح ديدان . .
تنهش فى قلبى . . تهدّنى . .
همة دود الأرض . . واحنا ملحها . .
همة فتنة . .
بين قلوب عاشت توحد ربها . .
ماتخافيش منهم ياأمى . .
دول هفايا أو عبيد . .
دول مش رجال . .
واحنا أقوى م الجبال . .
بعدين راح آجى . . يمكن آجى . .
وبرضه يمكن . .
برضه اتوه وسط الزحام . .
وان جيت راح اسمع . .
شفتى إيه يامـّايا عنى . .
فى الحقيقة وفى المنام . .
…………………………
محيى سنبل
………………………………………………
قصيدة كتبتها من عشر سنوات بتفكرنى بحواراتى مع أمى رحمها الله وكانت تكره السياسة والإنشغال بها خوفا على أبنائها . .
من ديوانى ” طوفان الغضب

تعليقات الفيس بوك

التعليقات

رابط مختصر