*آخر الوصية*

Spread the love

آخر الوصية

******************

كل يوم يروح

منا يا ناس شهيد

وكمان حقه يروح

مفيش عقاب يبيد

إزاى ساكتين عليه

إزاى سايبينه حر

عايش حياته عادى

وأم الشهيد فى مر

دى دموع الأم غالية

وده يا ناس ضناها

كبر قدام عينيها

ولمصر كان يرعاها

إزاى أقولك أمى

فيه أم تسيب ضناها

ينزف ده برده دمى

مين غيرى يكون حاميها

ماتقولى حاجه يا أما

واقفة عاجزة ليه

ماتقولى هو إبنى

مش هقبل أبكى عليه

أقولك أمى ولا

أقول يا مصرنا

كنتى زمان الجنة

وبقى عادى دمنا

ماتجيبى حقى يلا

خلينى أموت مرتاح

إسجنى وأعدميهم

خدى حق اللى راح

عارف دمى غالى

ولا يتساوى بيهم

لكن البركة فى إبنك

يقف ويعاديهم

كفاية يا أمى بكا

دموعك حارقة فيا

عارف فراق الضنا

وده صعب كمان عليا

فاكرة أخويا لما

مات زيي شهيد

أوعى أشوفك يا أما

بتبكى إنى شهيد

خلى ولادك يجيبوا

حق دم الشهيد

وفكريهم دايماً

إن الشهيد سعيد

ده عند ربه عايش

فى النعيم أكيد

أمى أوعاكى تنسى

إن اللى راح ده إبنك

كان فى خدمته

دايماً شايل همك

وإغتالوه كلاب

عشان يضعفوكى

وتعيشى فى عذاب

وعنى يبعدوكى

لكن بحلف بالله

رب الكون يا أمى

أخواتى ولادك

أبدا ً ما يسيبوا حقى

وأنا أقسمت يمين

وعارف فيكى رجالة

بيباتوا سهرانين

 يحموكى م الخاينين

خلاص بودعك

أنا اللى إسمى شهيدك

وأوعى يوجعك

فراقى ده يوم عيدك

فكرى ولادى بيا

قولى كان نور عينيا

وأغلى حاجة ليا

عاش تعبان عشانى

ومات يحب فيا

وحبك مش شوية

سلام يا أم الغالى

ودى آخر الوصية

 ************************

بقلم

أميرة الألفى

تحرير

أميرة الألفى

تعليقات الفيس بوك

التعليقات

عن سكرتيرة التحرير الكاتبة أميرة الألفي

x

‎قد يُعجبك أيضاً

*”المدفعجية” تحيى حفلات الربيع بالغردقة والجلاء والقرية الفرعونية*

Spread the loveتحيى فرقة المهرجانات “المدفعجية” عدة حفلات خلال أعياد الربيع، حيث ...